Hazrat Hafsa Biography in Urdu

Nabi-e-Kareem (S.A.W) ke daryaye rehmat, chashma-e-ilm-o-hikmat aur faiz-e-sohbat se hissa panay wali khush naseebon mein ek Hazrat Syedatuna Hafsa (R.A) bhi hain, jo ke Ameer-ul-Momineen Hazrat Syedna Umar Farooq-e-Azam (R.A) ki sahibzadi hain.

Naam o Nasab

Aap (R.A) ka naam Hafsa aur walida ka naam Zainab bint-e-Maz'oon tha. Aap (R.A) Huzoor (S.A.W) ke ilan-e-nabuwwat se 5 saal pehle peda hui. Aap apne walid-e-mohtaram ki targhib par noor-e-iman se musharraf hui aur apne pehle shohar Hazrat Khunais bin Huzafa Sahmi (R.A) ke sath Makka Mukarrama se Madina Munawwara hijrat farmai.

Ausaf o Kirdar

Aap (R.A) nihayat buland himmat, bohot zyada roze rakhne wali aur raat ibadat mein guzarne wali abida aur zahida khatoon thin (Seer Aalam al-Nubala, Jild 3, Safa 492). Ek dafa Jibreel-e-Ameen (A.S) Huzoor (S.A.W) ki bargah mein hazir hue aur aap ki ibadat aur riyazat ka zikr farmaya:

"Ye bohot zyada roze rakhne wali, raat ko zyada qayam karne wali aur Jannat mein aap ki ahliyah hain.” (Al-Isabah, Jild 8, Safa 86)

Aap (R.A) kasrat se tilawat-e-Quran karti thin. Haq goi, hazir jawab aur fahm-o-firasat mein apne walid-e-mohtaram ka mizaj paya tha.

Huzoor (S.A.W) se Nikah

Hazrat Khunais bin Huzafa Sahmi (R.A) ki shahadat ke baad Huzoor (S.A.W) ne 3 Hijri mein aap se nikah farmaya.

Shoq-e-Ilm

Aap (R.A) ko ilm-e-deen ka bohot shoq tha. Jo baat maloom na hoti, bina jhijhak Huzoor (S.A.W) se pooch leti thin. Ek dafa Huzoor (S.A.W) ne Jang-e-Badr aur Hudaybiya mein shareek hone wale Musalmanon ke bare mein farmaya:
"Mujhe umeed hai insha’Allah (A.W.J) in mein se koi bhi dozakh mein nahi jayega.”
Aap (R.A) ne arz ki:

"Kya Allah (A.W.J) ne yeh nahi farmaya: Tum mein koi aisa nahi jiska guzarna dozakh par na ho)" (Para 16, Surah Maryam: 71)

To Huzoor (S.A.W) ne irshad farmaya:

"Allah (A.W.J) ne yeh bhi farmaya hai: Phir hum dar walon ko bacha lenge aur zalimon ko ghutnon ke bal chor denge” (Para 16, Surah Maryam: 72).

Sha’an-e-Fiqah

Aap (R.A) ilm-e-hadith aur fiqh mein maharat rakhti thin. Hazrat Umar Farooq-e-Azam (R.A) bhi aurton ke shari masail mein aap se mashwara lete.

Safar-e-Aakhirat

Wisal se pehle aap (R.A) ne apna maal sadqa kar diya aur jayedad waqf karne ki wasiyat farmayi (Asad al-Ghaba, Jild 7, Safa 75). Maah-e-Sha'ban-ul-Moazzam 45 Hijri mein Madina Munawwara mein roze ki haalat mein 63 saal ki umar mein inteqal farmaya. Aap ki tadfeen Jannat-ul-Baqi mein, dusri Azwaj-e-Mutahharat ke paas ki gayi.

Hazrat Hafsa Biography in Urdu